Klöppuðu þegar sást til sólar

Júlíus Júlíusson, framkvæmdastjóri Fiskidagsins mikla, segir að nýafstaðin hátíð hafi gengið stórkostlega.

„Við erum rasandi hvað komu margir miðað við hvað það var búið að hamra á því næstum því að það myndi rigna eldi og brennisteini. Við erum sérstaklega glöð yfir því að sjá okkar traustu gesti,“ segir Júlíus.

Frétt af mbl.is

Gunnar heiðraður á Fiskideginum mikla

Á laugardeginum var þurrt á Dalvík til hálffimm þrátt fyrir að rignt hefði allt í kring, að sögn Júlíusar. „Meira að segja sást til sólar, sem átti engan veginn að geta gerst, og mikið var klappað. Þannig að veðurspáin rættist ekki og þetta var algjörlega magnað.“

Ljósmynd/Atli Rúnar Halldórsson

Talið er að á bilinu 27 til 28 þúsund manns hafi sótt Dalvík um helgina en Júlíus tekur fram að hátíðin snúist ekki um fjöldann heldur að „vera klár í það sem við erum að bjóða upp á“.

Í fyrsta sinn var hærra aldurstakmark á tjaldsvæðinu, eða 20 ár, og segir hann að það hafi haft góð áhrif. Munurinn á umgengninni hafi verið mikill. Býst hann við því að sami háttur verði hafður á á næsta ári.

Samhjálp fær afganginn sem varð af fiskinum á laugardaginn og er blaðamaður ræddi við Júlíus var hann í þann mund að ganga frá þeirri góðu sendingu.

Útlit er fyrir votan fiskidag á Dalvík í ár. Ljósmynd/Atli Rúnar

Páll Óskar skemmti lýðnum. Ljósmynd/Atli Rúnar Halldórsson

• Blogga um frétt