„Ég hef mikinn áhuga á stærðfræði og finnst hún skemmtileg. Svo vildi ég líka læra eitthvað sem nýtist vel í framtíðinni,“ segir Viktoría Smáradóttir, nýnemi í hugbúnaðarverkfræði við Háskólann í Reykjavík.
mbl.is tók hana tali þar sem hún var stödd á nýnemadegi háskólans þar sem hún hafði nýlokið kynningu á náminu.
„Mér lýst bara mjög vel á og líka á kennarann,“ segir Viktoría. Aðspurð segist hún ekki vita hversu margar stelpur séu að byrja í sama námi. „En mér fannst vera miklu meira af körlum á kynningunni,“ segir hún en lætur það ekki á sig fá.
En hvers vegna valdi hún nám við Háskólann í Reykjavík?
„Meiri tenging við atvinnulífið og meira verklegt nám. Svo er tölvunarfræðideildin betri.“
Blaðakona mbl.is rakst einmitt einnig á Egil Smára Smárason, nýnema í tölvunarfræðideild HR, í Sólinni. Honum leyst að sögn vel á námið.
„Ég heyrði bestu hlutina um tölvunarfræðideildina hér,“ segir Egill, en hann var staddur í góðra vina hópi þegar mbl.is tók hann tali og kvaðst þekkja þó nokkra sem væru að byrja með honum í náminu.
„Þetta er mjög fjölmennt nám og félagslífið lítur vel út.“
„Ég kynnti mér hvernig kerfið í HR virkar og það hentaði mér hvað þetta er allt minna, bekkjarkerfi og allt persónulegra,“ segir Matthildur S. G. Johansen, nýnemi í sálfræði.
Matthildur lauk háskólagrunni HR í vor og skráði sig rakleiðis í sálfræðinám við skólann. „Ég kynntist kerfinu í háskólagrunninum og áttaði mig á hvað það hentar mér vel.“
Matthildur kveðst hafa heyrt góða hluti um félagslífið við sálfræðideild HR. „Ég á vini sem hafa verið í náminu og er spennt að komast að því hvernig þetta verður.“
Að grunnnámi loknu stefnir Matthildur á mastersnám í klínískri sálfræði. „Svo sé ég til hvað verður út frá því.“
Gísli Fannar Egilson lauk einnig háskólagrunni í vor og hefur nú nám við Viðskiptafræðideild HR. „Háskólagrunnurinn var mjög gott en krefjandi nám,“ segir Gísli Fannar í samtali við mbl.is. Fyrir honum var það aldrei spurning að halda áfram í HR.
„Ég var búinn að kynna mér Viðskiptafræðideildina hérna áður en ég byrjaði í háskólagrunninum. Ég fór á kynningar hjá báðum skólum og leyst betur á HR út frá kynningunni. Maður hefur líka heyrt að viðskiptadeildin hérna sé betri og persónulegri kennsla.“