Íbúar í Hæðargarði fögnuðu því í dag að hugmynd þeirra skyldi vera orðin að veruleika. Hugmyndin var fjölnota hreysti- og klifursvæði sem tekið var í notkun í dag. Svæðið var sett upp eftir hugmyndaleit og kosningu meðal íbúa sem hluti af íbúalýðræðisverkefninu „Hverfið mitt“. Æfingatækin eru staðsett á opnu svæði við Hæðargarð 33 – 35.
Starfsfólk og notendur félagsmiðstöðvarinnar við Hæðargarð stóðu fyrir nafnasamkeppni. Nafnið Hæðarvellir fékk flest atkvæði en skilti með nafninu var afhjúpað í dag ásamt vísu frá Jóni Hallssyni sem hljóðar svo:
„Hæðarvellir“ heita skalt
hreyfing skapa mikla
verði úti veður kalt
vöðva má samt hnykla.
Á svæðinu er að finna tylft tækja ásamt leiðbeiningum um æfingar. Í tilefni dagsins prufukeyrðu íbúar í hverfinu tækin undir leiðsögn íþróttafræðings. Bryndís Hreiðarsdóttir, verkefnisstjóri félagsstarfs fullorðinna í Bústaðahverfi og Háaleiti, segir í fréttatilkynningu frá Reykjavíkurborg að vegna nálægðar við félagsmiðstöðina að Hæðargarði 31 hafi verið valin tæki sem henta eldra fólki. Bryndís stóð fyrir íslenskun leiðbeininga sem fylgdu tækjunum.