Litríkar furðuverður hafa lífgað upp á ruslatunnur í Vestmannaeyjum í sumar. Frænkurnar Ísabella Tórshamar og Guðný Tórshamar standa á bakvið listaverkin, sem hafa vakið mikla athygli meðal bæjarbúa og ferðamanna.
„Okkur langaði að skreyta bæinn aðeins og gera hann líflegri og litríkari og ákváðum að byrja á ruslatunnunum. Það er kannski aðeins skemmtilegra að sjá þetta en þessar grænu venjulegu tunnur,“ segir Ísabella í samtali við mbl.is. Óskar Guðjón Kjartansson, bæjarverkstjóri hjá Vestmannaeyjabæ, vissi af hæfileikum Ísabellu og hafði milligöngu um verkefnið.
Furðu- og ævintýraverur af ýmsu tagi prýða sjö ruslatunnur í bænum og hafa viðbrögð bæjarbúa, og ekki síst ferðamanna, verið góð. Bæjaryfirvöld eru einnig mjög ánægð með framtakið og til stendur að útfæra verkefnið enn frekar. „Það væri mjög stórt skref að fá að mála veggi, en annars væri ég til í að mála fleiri litla hluti, eins og tunnur og umferðareyjur,“ segir Ísabella.
Ísabella, sem er 19 ára, hefur haft gaman af því að teikna og skapa frá því að hún man eftir sér. „Þetta er það skemmtilegasta sem ég geri.“ Samhliða ruslatunnumáluninni starfar Ísabella sem pizzabakari á 900 Grillhúsi í bænum. „En ég lít eiginlega ekki á ruslatunnurnar sem vinnu, þó að ég fái laun frá bænum fyrir að mála, mér finnst bara stórkostlegt að ég fái borgað fyrir þetta.“
Ísabella sækir innblástur í ævintýri, dýr, skrípafígúrur og skrímsli og sé hún fyrir sér að vinna frekar með fígúrurnar sem prýða ruslatunnurnar. Þá stefnir hún á listnám í framtíðinni. „Ég stefni á það eftir áramót að fara í skóla þar sem ég get verið á listalínu.“