Leit með kafbáti ekki borið árangur

Kafbáturinn settur í vatnið og er stýrt með fjarstýringu.
Kafbáturinn settur í vatnið og er stýrt með fjarstýringu. Ljósmynd/Aðsend

Leit að líki belgíska ferðamannsins sem talinn er hafa fallið í Þingvallavatn í vikunni hófst að nýju klukkan níu í morgun og stendur enn yfir. Í dag hefur leitin einungis farið fram með litlum kafbáti eða neðansjávardróna sem stjórnað er af tveimur mönnum í báti. Þetta segir Gunnar Ingi Friðriksson, formaður svæðisstjórnar björgunarsveita, í samtali við mbl.is.

Kafbáturinn sem notaður er í dag kemst á um það bil 70 metra dýpi að sögn Gunnars. Á slíku dýpi sé skyggnið þó slæmt sem gerir leitaraðilum erfitt fyrir. Leitin mun halda áfram eitthvað frameftir degi en hversu lengi fer eftir aðstæðum og veðri en það á að hvessa seinni parts dags.

Eftir því sem kafbáturinn kafar dýpra verður skyggnið verra. Á ...
Eftir því sem kafbáturinn kafar dýpra verður skyggnið verra. Á þessari mynd er skyggnið nokkuð gott en hún er tekin þegar kafbáturinn var á um 40 metra dýpi. Ljósmynd/Aðsend

Aðkomu björgunarsveita líklega lokið eftir daginn

Í gær voru kafarar, þyrla og sónartæki notuð við leitina en án árangurs. Leitin í dag hefur ekki skilað árangri enn sem komið er því leitarsvæðið gríðarlega stórt og mikið dýpi á sumum stöðum.

Gunnar Ingi býst við því að aðkoma björgunarsveita að leitinni ljúki eftir daginn í dag þar sem á morgun sé líklegt að stærri kafbátur, Gavia, verði notaður við leitina og menn frá framleiðslufyrirtæki hans, Teledyne Gavia muni sjá um leitina í samstarfi við lögregluyfirvöld.

Það hefur þó ekki verið ákveðið enn sem komið er, bætir Gunnar Ingi við að lokum.

Það fer ekki mikið fyrir kafbátnum en hann er litlu ...
Það fer ekki mikið fyrir kafbátnum en hann er litlu stærri en hefðbundinn dróni. Hann er með tvær skrúfur og lítur svolítið út eins og Kitchen Aid-hrærivél. Ljósmynd/Aðsend
Leitaraðilar komu á vettvang og hófu leit um klukkan níu ...
Leitaraðilar komu á vettvang og hófu leit um klukkan níu í morgun. Ljósmynd/Aðsend
Þingvallavatn er gríðarlega stórt og djúpt. Það væri líklega auðveldara ...
Þingvallavatn er gríðarlega stórt og djúpt. Það væri líklega auðveldara að leita að nál í heystakki. Ljósmynd/Aðsend
mbl.is