Mótmæla breyttum inntökuskilyrðum í lögreglunám

ADHD samtökin segja markmið nýju reglanna vera það eitt að ...
ADHD samtökin segja markmið nýju reglanna vera það eitt að útiloka fólk með ADHD frá störfum innan lögreglunnar. mbl.is/Eggert Jóhannesson

ADHD samtökin mótmæla harðlega breyttum inntökuskilyrðum í lögreglunám sem Mennta- og starfþróunarsetur lögreglurnar upplýsti nýlega um. Segja samtökin þetta vera í fyrsta skipti sem þrengt sé „verulega að atvinnu- og menntamöguleikum fólks með ADHD“ hér á landi.

Er það mat ADHD samtakanna reglubreytingin byggist á „vanþekkingu, úreltum hugmyndum og stangast beinlínis á við lög og vísindalega þekkingu um ADHD og virkni ADHD lyfja. Svo getur virst sem þekkingu höfundar reglnanna, á málaflokknum, sé alvarlega ábótavant sem má meðal annars sjá af orðalagi þess hluta leiðbeininganna sem fjallar um læknisvottorð,“ að því er segir í yfirlýsingu samtakanna

Benda þau jafnframt á að yfirvöld hermála í Noregi hafi nýverið afnumið sambærilegar takmarkanir við inntöku einstaklinga með ADHD í norska herinn „enda talið fráleitt að setja svo alvarlegar og almennar skorður við atvinnufrelsi fólks með ADHD, líkt og nýjar reglur Mennta- og starfsþróunarseturs lögreglunnar gera ráð fyrir“.

Skora ADHD samtökin á Mennta- og starfsþróunarsetur lögreglunnar, ríkislögreglustjóra og ráðherra málaflokksins, að afturkalla nýju inntökureglurnar nú þegar. Markmið þeirra virðist vera það eitt að útiloka fólk með ADHD frá störfum innan lögreglunnar.

Reglurnar geti ennfremur orðið til þess að þeir lögreglumenn sem nú þegar eru starfandi og eru með greint eða ógreint ADHD veigri sér við að leita sér aðstoðar og það geti svo aftur haft neikvæð áhrif á starfsgetu þeirra innan lögreglunnar.

„ADHD samtökin munu aldrei sætta sig við hinar nýju reglur og heita því að berjast gegn slíkri mismunun, hérlendis og annarsstaðar þar sem slíkar reglur eru enn í gildi. Um það hefur þegar tekist samstarf við systursamtök ADHD samtakanna á Norðurlöndunum.“

mbl.is