Reksturinn þungur og krefjandi

Tímamæld yfirvinna Sjúkrahússins á Akureyri jókst um 16% á árabilinu ...
Tímamæld yfirvinna Sjúkrahússins á Akureyri jókst um 16% á árabilinu 2016 til 2018. mbl.is/Skapti Hallgrímsson

Rekstur Sjúkrahússins á Akureyri hefur verið krefjandi og þungur það sem af er ári. Þetta kemur fram í pistli forstjórans Bjarna Jónassonar á vef sjúkrahússins.

Segir Bjarni mestu þar muna um greiðslur vegna yfirvinnu, sem séu „mun meiri en gert var ráð fyrir en einnig er kostnaður hjúkrunar- og lækningavara hærri“. Tímamæld yfirvinna í klukkustundum talið hafi aukist um 16% fyrir árabilið 2016 til 2018 og að óbreyttu stefni í að tímamæld yfirvinna haldi áfram að aukast frá fyrra ári.

„Það er ljóst að ekki verður við slíkt búið áfram,“ segir Bjarni í pistli sínum. „Því verðum við öll að skoða hvað hægt er að gera til að snúa þessari þróun við. Það kann að kalla á aðra nálgun við okkar daglegu verkefni svo sem breytt vinnulag og breytta vinnuferla – straumlínulagaðri. Ég trúi því að með samstilltu átaki þá takist að snúa þessari þróun við.“

Starfsemi sjúkrahússins hefur, að hans sögn, engu að síður gengið vel það sem af er ári og vel gengið að sinna þeim sjúklingum sem þangað hafi leitað. Heldur færri hafa leitað á bráðamóttöku en í fyrra, en aukning er í komum á dag- og göngudeildir. Biðlistaaðgerðir hafi þá gengið vel og séu í samræmi við það sem áætlað var.

mbl.is