Færri komust að en vildu

Nemendur tölvuleikjagerðarbrautar við Menntaskólann á Ásbrú.
Nemendur tölvuleikjagerðarbrautar við Menntaskólann á Ásbrú.

Alls hófu 44 nemendur nám við nýja námsbraut Menntaskólans á Ásbrú í tölvuleikjagerð í gær. Komust færri að en vildu.

Fyrsta skólasetning nýrrar námsbrautar Menntaskólans á Ásbrú fór fram í gær að viðstaddri Lilju Alfreðsdóttur, mennta- og menningarmálaráðherra. Þar komu saman nemendur í fyrsta árangi tölvuleikagerðarbrautar skólans en nýbreytni er að boðið sé upp á slíkt nám á framhaldsskólastigi hér á landi, að því er segir í fréttatilkynningu frá menntamálaráðuneytinu.

„Tilurð þessarar nýju brautar er gott dæmi um árangurríkt samstarf stjórnvalda, menntakerfisins og atvinnulífsins og vil ég þakka Keili, Samtökum iðnaðarins, Samtökum leikjaframleiðenda og Samtökum verslunar og þjónustu fyrir árangursríka samvinnu við það að koma brautinni á laggirnar. Með þeirri ákvörðun að veita fjármagni til þessa verkefnis standa vonir til þess að með auknu námsframboði á framhaldsskólastigi finni fleiri nemendur nám við hæfi að loknum grunnskóla. Það er fátt eins nauðsynlegt fyrir okkur sem samfélag en að hver og einn fái notið sín í því sem hann tekur sér fyrir hendur,“ sagði ráðherra af þessu tilefni.

Námið byggir á kjarna- og valfögum sem einskorðast ekki aðeins við forritun heldur taka á fjölbreyttum þáttum sem skapandi starf leikjagerðarfólks krefst, s.s. hönnun, tónlist, hljóðupptökum, verkefnastjórnun, heimspeki o.fl. Þá er starfsnám og verkefna- og hópavinna mikilvægur hluti námsins.

mbl.is