Flatey gerð að verndarsvæði í byggð

Lilja Alfreðsdóttir mennta- og menningarmálaráðherra og Tryggi Harðarson sveitarstjóri Reykhólahrepps.
Lilja Alfreðsdóttir mennta- og menningarmálaráðherra og Tryggi Harðarson sveitarstjóri Reykhólahrepps. Ljósmynd/Aðsend

Þorpið í Flatey á Breiðafirði hefur nú verið skilgreint sem verndarsvæði í byggð. Lilja Alfreðsdóttir mennta- og menningarmálaráðherra staðfesti þessar ákvörðun í heimsókn sinni til Flateyjar um síðustu helgi.

Var þetta gert að fenginni tillögu Reykhólahrepps og umsögn Minjastofnunar Íslands, en markmið með ákvörðuninni er að stuðla að verndun sögulegrar byggðar. Um er að ræða þorpið sjálft, mýrar, strönd og svæði umhverfis Flateyjarkirkju.

Í tillögu Reykhólahrepps var m.a. tilgreint að  „byggð í Flatey beri vitni um ríka virðingu fyrir menningarverðmætum og lífríki og að vandað sé til viðhalds húsa, minja og landslags út frá varðveislugildi en um leið leitast við að styðja við samfélag eyjarinnar.“ Unnið verði að því að vernda og svipmót byggðarinnar og styrkja og viðhalda byggingarlistarlegu og menningarsögulegu gildi byggðarinnar, ásamt samspili við einstaka náttúru og landslag.

„Byggðin í Flatey er merkileg fyrir ýmsar sakir. Með verndarsvæðinu er stuðlað að verndun og viðhaldi einstakra húsa sem hér eru sem og þorpsins í heild, ásamt því að tryggja vernd einstakrar náttúru og landslags. Ég óska samfélaginu í Flatey til hamingju með þennan áfanga,“ er haft eftir ráðherra í frétt á vef Stjórnarráðsins.

mbl.is