Íslendingar á Spáni fargi kjötbúðingi

Listeríumengaður kjötbúðingur frá vörumerkinu „La Mechá“ er talinn hafa valdið veikindum yfir 100 manns á Spáni, aðallega í Andalúsíu en vitað er um tilfelli víðar frá því í maí síðastliðnum.

Íslendingar sem dvelja á meginlandi Spánar eða Kanaríeyjum um þessar mundir og kunna að eiga kjötbúðing frá „La Mechá“ í kæliskáp eða frysti eru hvattir til að farga honum.

Það eru einkum ung börn, aldraðir, þungaðar konur og fólk með skert ónæmiskerfi sem veikjast. Ein öldruð kona hefur látist vegna þessarar sýkingar. Kjötbúðingurinn hefur verið seldur víða á meginlandi Spánar og einnig á Kanaríeyjum.

Þetta kemur fram í tilkynningu á vef Landlæknis.

Hætt er við listeríusmiti frá ýmsum matvælum sem seld eru tilbúin til neyslu. Þar má nefna ógerilsneydda osta, reyktan lax og álegg. Einnig kemur fyrir að smit hafi verið rakið til frosins, létteldaðs grænmetis sem neytt er án hitunar, s.s. í salati.

Listería er kuldaþolin umhverfisbaktería sem getur auðveldlega borist inn í vinnsluumhverfi matvælafyrirtækja. Fari eitthvað úrskeiðis í framleiðslunni, s.s. vegna eftirmengunar, er hætta á að listería nái að fjölga sér á ný eftir uppþýðingu, að því er segir í tilkynningunni.

Mjög langur tími getur liðið frá neyslu listeríumengaðra matvæla þar til einkenni koma fram, oft um þrjár vikur en getur jafnvel liðið lengri tími.

mbl.is