„Við fórum yfir verklag á borgarhátíðum og útskýrðum okkar starfsumhverfi,“ sagði Sigríður Björk Guðjónsdóttir, lögreglustjóri Lögreglunnar á höfuðborgarsvæðinu (LRH) í samtali við Morgunblaðið. Sigríður Björg mætti í dag ásamt yfirlögregluþjóni á fund mannréttinda-, nýsköpunar- og lýðræðisráðs Reykjavíkurborgar, þar sem verklag lögreglu á hátíðum á vegum borgarinnar var til umræðu.
Mál ungrar konu þar sem var handtekin vegna gruns um mótmæli á hinsegin dögum rataði í fjölmiðla í vikunni og óskaði Dóra Björt Guðjónsdóttir, borgarfulltrúi Pírata og formaður ráðsins, í kjölfarið eftir að fulltrúi lögreglunnar mætti á fundinn til að fara skipulega yfir vinnureglur sem gilda á hátíðum sem þessum. Einng stóð til að ræða hvert þeir sem telja lögreglu hafa brotið á sér geta leitað og hvernig tekið sé á slíku. Sagði Dóra að með þessu vilji borgin sýna ábyrgð og betrumbæta sambandið milli lögreglu og borgarbúa.
Að sögn Sigríðar Bjarkar eru hátíðirnar bundnar þeim skilyrðum að lögreglan sé með gott utanumhald. „Þetta fer allt fram í góðu samstarfi og er skipulagt á vinnufundum með borginni og þeim sem að hátíðunum standa,“ sagði hún.
Ríkislögreglustjóri hafi gefið út nýtt hættumat fyrir bæjarhátíðir fyrir um þremur árum og Lögreglan á höfuðborgarsvæðinu hafi hagað skipulagi sínu í samræmi við það. Þar er m.a. kveðið á um aukinn sýnileika lögreglu á hátíðunum, að sérstaklega sé gætt að lokunum m.a. til að koma í veg fyrir að hægt sé að aka inn í mannfjölda og að lögreglan sé viðbragðsfljót ef eitthvað gerist.