Útvarp 101 verður símafyrirtæki

Unnsteinn Manúel kynnti nýja símafélagið á blaðamannafundi í morgun.
Unnsteinn Manúel kynnti nýja símafélagið á blaðamannafundi í morgun. mbl.is

Nýtt íslenskt símafélag hóf göngu sína eftir blaðamannafund í Hörpu í morgun. Það gengur undir nafninu 101 Sambandið og er rekið á dreifikerfum Vodafone. Sýn hf., eigendur Vodafone á Íslandi, á þá helmingshlut í rekstrarfélagi símafélagsins. Velkomin í sambandið, er viðkvæðið, sbr. skilti á sumum strætóstoppistöðvum undanfarið.

Sama fólk er á bak við 101 Sambandið og Útvarp 101 og skrifstofurnar verða á sama stað. Svanhildur Gréta Kristjánsdóttir, sem hefur verið útvarpsstjóri hjá Útvarpi 101, tók til máls á fundinum í morgun, rétt eins og Unnsteinn Manuel Stefánsson listamaður. Eigendur Útvarps 101 eru, rétt eins og símafélagsins, Sýn hf. til hálfs og listamenn ýmsir til hálfs, Logi Pedro, bróðir Unnsteins; Jóhann Kristófer Stefánsson, Joey Christ; Sigurbjartur Sturla Atlason, Sturla Atlas; Aron Már Ólafsson, Aronmola og svo framvegis.

101 Sambandið er nýtt símfyrirtæki. Svanhildur Gréta Kristjánsdóttir, útvarpsstjóri hjá ...
101 Sambandið er nýtt símfyrirtæki. Svanhildur Gréta Kristjánsdóttir, útvarpsstjóri hjá Útvarpi 101, og Unnsteinn Manuel Stefánsson, listamaður og talsmaður nýs símfyrirtækis. mbl.is/Snorri

101 Sambandið hefur innreið sína inn á markað harðrar samkeppni. Það virðast byrja á að undirbjóða það sem þegar er í boði á markaði. Ódýrasta leiðin þeirra er 1.990 krónur á mánuði fyrir 10 GB. Hjá flestum fá menn 5GB fyrir það verð. Þá má færa gagnamagn á milli áskrifenda, „hjálpa vini í neyð“, sem er einnig sögð nýjung á fjarskiptamarkaði.

Samstarf við Sýn

101 Productions, rekstrarfélagið á bak við þetta, hefur rekið Útvarp 101 frá því í haust, í samstarfi við Sýn. Sýn fór að reka Vodafone um svipað leyti og það eignaðist fjölmiðlana Vísi, Bylgjuna, X-ið og svo framvegis, þegar 365 miðlar voru seldir, þegar Ingibjörg Pálmadóttir og eiginmaður hennar Jón Ásgeir færðu rekstur Fréttablaðsins undir félagið Torg og héldu áfram að standa í honum, en ekki annarri fjölmiðlun.

365 miðlar ráku sitt eigið símafyrirtæki á sínum tíma undir merkjum 365 miðla, sem vel að merkja hafði áður verið Tal, en það var leyst upp þegar fjölmiðlarnir í eigu 365 fóru yfir til Sýnar annars vegar og Torgs hins vegar. Líta má á þetta útspil Útvarps 101 sem viðleitni Sýnar til þess að ná til unga fólksins, með hliðstæðum hætti og til dæmis Síminn gerir með Þrennu. Þrenna stendur einnig á ákveðnum tímamótum um þessar mundir, enda hefur Berglind Pétursdóttir „festival“ látið þar af störfum sem markaðssérfræðingur.

mbl.is