Arnar og Hólmfríður Íslandsmeistarar

Barbora Nováková frá Tékklandi sigraði í maraþoni kvenna.
Barbora Nováková frá Tékklandi sigraði í maraþoni kvenna. mbl.is/Eggert Jóhannesson

Arnar Pétursson var fyrstur í mark í maraþoni Reykjavíkurmaraþons Íslandsbanka, sem jafnframt er Íslandsmeistaramót í maraþoni og er Arnar því Íslandsmeistari fjórða árið í röð.

Arnar kom í mark á tímanum 2:23:08 og er það besti tími sem Íslendingur hefur náð í Reykjavíkurmaraþoni.

Barbora Nováková frá Tékklandi sigraði í maraþoni kvenna og kom í mark á tímanum 3:00:40. Í öðru sæti og fyrst íslenskra kvenna var Hólmfríður J. Aðalsteinsdóttir á tímanum 3:04:43 og er hún því Íslandsmeistari í maraþoni.

Brian Petrocelli frá Bandaríkjunum var í öðru sæti á 2:38:20 og í þriðja sæti Drake Vidrine, einnig frá Bandaríkjunum á 2:44:45. Fjórði og annar Íslendingur í mark var Sigurjón Ernir Sturluson á 2:45:40 en í þriðja sæti í Íslandsmeistaramótinu var Kristján Svanur Eymundsson á 2:49:50.

Hlynur Ólason og Katerina Kratochvilova Kriegelova frá Tékklandi unnu í 10 kílómetra hlaupinu með tímana 33:59 og 35:49. Fyrst íslenskra kvenna var Elín Edda Sigurðardóttir á 35:55

mbl.is