Búið er að slökkva eldinn sem kviknaði í álverinu í Straumsvík í kvöld. Allt tiltækt lið slökkviliðs höfuðborgarsvæðisins var kallað út en starfsmenn í álverinu náðu tökum á eldinum. Einn slökkviliðsbíll frá Hafnarfirði er á vettvangi en öðrum starfsstöðvum var snúið við.
Engin slys urðu á fólki. Tjónið er óverulegt, að sögn Bjarna Más Gylfasonar, upplýsingafulltrúa Rio Tinto á Íslandi.
Reykurinn var sótsvartur um tíma og lagði beint upp af verksmiðjunni í logninu í kvöld. Margir íbúar á höfuðborgarsvæðinu urðu varir við reykinn í ljósaskiptunum og fékk mbl.is fjölmargar ábendingar og myndir.
Fréttin hefur verið uppfærð.