Björguðu manni úr brennandi húsi

Alls tóku aðgerðir slökkviliðs um 40 mínútur áður en vettvangurinn …
Alls tóku aðgerðir slökkviliðs um 40 mínútur áður en vettvangurinn var afhentur lögreglunni til rannsóknar. mbl.is/Eggert Jóhannesson

Slökkvilið Brunavarna Suðurnesja var kallað út á fjórða tímanum í dag vegna reyks sem barst úr húsi við Hlíðarveg í Reykjanesbæ. Slökkviliðsmaður á frívakt var fyrstur á staðinn og kom í ljós að maður var inni í húsinu.

Reykkafarar fóru inn og sóttu manninn sem var fluttur rakleiðis á slysadeild Landspítalans í Fossvogi, talsvert slasaður. Þetta staðfestir varðstjóri hjá Brunavörnum Suðurnesja í samtali við mbl.is, en Vísir greindi fyrst frá.

Kviknað hafði í í eldhúsi hússins og var reykur kominn út um allt hús, svo slökkviliðsmaðurinn á frívakt hætti sér ekki inn en lét liðsfélaga sína rakleiðis vita að maður væri inni í húsinu. 

Reykkafarar voru því tilbúnir að fara inn í húsið um leið og á staðinn var komið og björguðu manninum úr húsinu. Alls tóku aðgerðir slökkviliðs um 40 mínútur áður en vettvangurinn var afhentur lögreglunni til rannsóknar.

mbl.is