Marglytturnar, hópur kvenna sem ætlar að synda boðsund yfir Ermarsundið, lagði af stað frá höfninni í Dover núna klukkan sex í morgun eins og áætlað var.

Hóp­ur­inn hafði áður þurft að fresta sund­i sínu um helg­ina sök­um óhag­stæðra vinda og mik­ils öldu­gangs. Nú eru veður­skil­yrði hins veg­ar eins ákjós­an­leg og þau ger­ast en dagurinn í dag var jafn­framt síðasta tæki­færi þeirra til að hefja sundið.

„Spáin virðist ætla að standast, líka Frakklandsmegin, þannig að þær eru þá líklegar til að ná landi og stemningin í hópnum er alveg gríðarlega góð,“ sagði Soffía Sig­ur­geirs­dótt­ir, skipu­leggj­andi Mar­glytt­anna, í samtali við mbl.is nú í morgun. 

„Þær eru allar tilbúnar að fara í sjóinn,“ bætir hún við. Sig­ur­laug María Jóns­dótt­ir var fyrsta Mar­glytt­an sem stakk sér til sunds og gengur sundið vel hjá henni. „Það er ofboðslega fallegt veður og það er mikil ánægja hjá hópnum að hafa lagt af stað núna í morgun af því að núna ná þær að synda í björtu í allan dag.“

Veður­skil­yrði fyr­ir Erm­ar­sund hafa verið óvenjuslæm í sum­ar og marg­ir sund­menn þurft að bíða lengi og jafn­vel ekki kom­ist af stað. Mar­glytt­urn­ar hafa verið við æf­ing­ar í Do­ver síðan 2. sept­em­ber og eru með sundrétt frá 3. til 10. sept­em­ber.

Þrátt fyrir góð veðurskilyrði er vegalengdin sem synt er oft lengri sökum strauma, en áætlað er að sundið muni taka Marglytturnar sex um 16-18 tíma. Hver og ein Marglytta mun synda tvisvar til þrisvar í fyrirfram ákveðinni röð. Boðsundið þarf að fylgja settum reglum til þess að fást staðfest sem fullgilt sund af the English Channel Association.

Marglytturnar í sjósundsgallanum. Ljósmynd/Aðsend

Mar­glytt­ur vilja sporna gegn plast­meng­un í hafi og eru að safna áheit­um fyrir Bláa her­inn. Mark­miðið með sund­ferðinni er að vekja at­hygli á áhrif­um plast­meng­un­ar á lífríki sjávar og mik­il­vægi þess að vernda auðlind­ir hafs­ins en ástand lífríkis í Erm­ar­sund­inu er mjög slæmt.

Hægt er að heita á Bláa her­inn í gegn­um AUR-appið í síma 788-9966, einnig er hægt að leggja inn fjár­hæð á reikn­ing 0537-14-650972, kt. 250766-5219. Hægt er að fylgj­ast með sundi Mar­glytt­anna á Face­book. 

Tengdar fréttir

Marglyttur synda yfir Ermarsund

Andstyggilegt en samt svo gaman

• Marglyttunum tókst ætlunarverkið
• Þyngra í Marglyttum vegna veðurs og kulda
• Þurfa að synda í gegnum stóran olíuflekk
• Þóreyju flökurt síðustu mínúturnar í sjónum

» Fleiri tengdar fréttir

• Blogga um frétt