Katrín Jakobsdóttir forsætisráðherra segir það mjög jákvætt að yfirdeild Mannréttindadómstóls Evrópu (MDE) hafi ákveðið að fjalla um landsréttarmálið svokallaða, sem fjallar um það hvernig staðið var að skipun fjögurra dómara við Landsrétt.
„Mér fannst eðlilegt að óska eftir meðferð, sérstaklega í ljósi þess að dómurinn er fordæmislaus og ekki einróma. Mér finnst jákvætt að yfirdeildin hafi tekið þetta til meðferðar alveg óháð því hver niðurstaðan verður því það skiptir máli að fá endanlega niðurstöðu í þetta mál,“ segir Katrín í samtali við mbl.is.
Dómstóllinn komst að þeirri niðurstöðu í mars að íslenska ríkið hefði brotið gegn sjöttu grein Mannréttindasáttmála Evrópu við skipan fjögurra dómara við Landsrétt sem voru ekki metnir meðal 15 hæfustu af sérstakri hæfisnefnd.
Dómararnir fjórir hafa ekki dæmt við réttinn frá því að MDE kvað upp dóm sinn í mars. Tveir óskuðu eftir launuðu leyfi til áramóta en hinir ekki. Því hefur einungis verið ráðið í stöður dómaranna tveggja sem óskuðu eftir leyfi.
Áslaug Arna Sigurbjörnsdóttir dómsmálaráðherra ræddi landsréttarmálið á ríkisstjórnarfundi í morgun. „Hún hyggst fara yfir stöðuna hjá Landsrétti þar sem 13 af 15 dómurum eru að dæma. Ég vænti þess að hún muni síðan gera tillögu til ríkisstjórnar hvernig hún metur stöðuna hjá dómnum og hvort ástæða sé til að bregðast við,“ segir Katrín.
Málsmeðferð getur tekið allt að tvö ár og hefur Ingibjörg Þorsteinsdóttir, formaður Dómarafélags Íslands, kallað eftir aðgerðum stjórnvalda, til dæmis með því að fjölga dómurum við Landsrétt varanlega. Katrín getur ekki sagt til um á þessum tímapunkti hvort af því verði.
„Rétturinn þarf að vera starfhæfur og þá þurfum við að hafa fyrirliggjandi hver málastaðan er miðað við þá stöðu sem er uppi núna með 13 dómara að dæma,“ segir Katrín.
Áslaug Arna sagði í samtali við mbl.is í gær að hún hefði nú þegar óskað eftir upplýsingum um fjölda mála og stöðu þeirra við Landsrétt.