Stjórnir Lögreglufélags Eyjafjarðar (LFE) og Lögreglufélags Þingeyinga (LÞ) lýsa yfir stuðningi við stjórn Landssambands lögreglumanna (LL) og fagna frumkvæði dómsmálaráðuneytisins sem og þrýstingi lögreglustjóra landsins á að alhliða stjórnsýsluúttekt fari fram á embætti ríkislögreglustjóra.

„Samkvæmt lögum eru meginhlutverk RLS m.a. að sinna samræmingarhlutverki fyrir lögregluna og að veita margvíslega þjónustu við lögregluembættin, t.d. útvegun bíla og búnaðar. Ljóst er að margt hefur verið athugavert við stjórnsýslu RLS undanfarin misseri og þar má nefna yfirferð og endurnýjun verklagsreglna, fatamál, málefni fíkniefnahunda og stjórnenda þeirra sem og bílamálin sem mikið hafa verið til umfjöllunar,“ segir í yfirlýsingunni.

Frétt af mbl.is

Leggjast gegn hugmyndum um eitt lögregluembætti

Þetta hafi lögregluþjónar margoft bent á. Í því samhengi megi til að mynda vísa í ályktun frá síðasta landsþingi Landssambands lögreglumanna þar sem skorað var á dómsmálaráðuneytið að láta gera óháða úttekt á því hvort ekki mætti færa verkefni ríkislögreglustjóra til annarra embætta.

Bent er á að LFE hafi á síðustu tveimur árum sent frá sér ályktanir þar sem þungum áhyggjum er lýst af mönnunarmálum sérsveitar ríkislögreglustjóra á Norðurlandi, án breytinga.

„Stjórnir LFE og LÞ telja óþarfa af hálfu yfirstjórnar RLS að drepa á dreif umræðu um vanda RLS með því að benda á að heildarúttekt þurfi að fara fram á lögreglunni í landinu.  Við ítrekum að með stuðningsyfirlýsingu þessari er ekki verið að vega að hinum almenna starfsmanni RLS, heldur virðist okkur sem yfirstjórnun embættisins sé ekki sem skyldi. Við stöndum að baki Landssambandi lögreglumanna og þeim lögreglufélögum sem tjáð hafa sig um ofangreind málefni.“

Tengdar fréttir

Deilur innan lögreglunnar

Staðfestir launasamninga yfirlögregluþjóna

• Yfirlögregluþjónamál til Hæstaréttar
• Ömurlegt að standa í svona
• Yfirlögregluþjónar lögðu Sigríði aftur í launamáli
• Áfrýja dómi í launamáli yfirlögregluþjóna

» Fleiri tengdar fréttir

• Blogga um frétt