Viðurkenningar veittar fyrir hús og lóðir

Frá athöfninni í Höfða í dag.
Frá athöfninni í Höfða í dag. Ljósmynd/Reykjavíkurborg

Viðurkenningar fyrir fallegar lóðir fjölbýlishúsa og fyrirtækja og vandaðar endurbætur á eldri húsum í Reykjavík árið 2019 voru veittar við hátíðlega athöfn í Höfða í dag.

Dagur B. Eggertsson borgarstjóri og Sigurborg Ósk Haraldsdóttir formaður skipulags- og samgönguráðs Reykjavíkurborgar veittu viðurkenningarnar.

Í tengslum við afmæli Reykjavíkurborgar eru árlega veittar viðurkenningar fyrir fallegar stofnana-, fyrirtækja- og fjölbýlishúsalóðir og fyrir endurbætur á eldri húsum. Viðurkenningar árið 2019 hljóta eftirfarandi fimm lóðir og þrjú hús:

Lóðir:            

Tryggvagata 12-14

Ljósmynd/Reykjavíkurborg

Fær viðurkenningu fyrir skemmtilegt útisvæði þar sem efnismeðferð og frágangur er til fyrirmyndar. Vel unnin baklóð með aðgengi frá Vesturgötu og Norðurstíg. Grjót, hellur, corten, stál, viður og grasflatir brjóta rýmið upp. Skemmtilega unnið með rými og hæðasetningar húsanna í kring.

Birkimelur 3, Blómatorgið

Ljósmynd/Reykjavíkurborg

Fær viðurkenningu fyrir aðlaðandi útiumhverfi. Gatan hefur nýlega verið tekin í gegn og byggingin og útisvæðið sómir sér vel í umhverfinu og er snyrtilega viðhaldið.

Hádegismóar 1

Ljósmynd/Reykjavíkurborg

Fær viðurkenningu fyrir nýlega framkvæmda, stílhreina og vel hannaða atvinnulóð. Um er að ræða frekar látlausa hönnun sem nýtur sín vel við umfangsmikla bygginguna.

Starengi 8-20, 20a og 20b

Ljósmynd/Reykjavíkurborg

Fær viðurkenningu fyrir got viðhald á snyrtilegri fjölbýlishúsalóð í grónu úthverfi í Grafarvoginum. Gróðurinn nýtur sín vel og  leik- og dvalarsvæði eru í forgrunni í garðinum.

Icelandic Street Food – Laugavegi 85

Fær viðurkenningu fyrir snyrtilegt útiumhverfi við Laugaveginn. Veitingasvæði er afmarkað á látlausan hátt með palli og er fallega skreytt sumarblómum. Skilti á húsvegg og í gluggum gera mikið fyrir göturýmið.

Eldri hús:

Túngata 18

Ljósmynd/Reykjavíkurborg

Húsið á Túngötu 18 var teiknað af Guðjóni Samúelssyni árið 1922. Árið 1955 var húsið tekið í notkun fyrir þýska sendiráðið en í dag er það sendiráðsbústaður Þýskalands. Ytra borð hússins var friðað árið 1991. Nýlegar endurbætur hafa fært húsið nær sinni upprunalegu mynd, m.a. með nýjum smárúðugluggum og er breytingin til fyrirmyndar.

Laugarásvegur 11

Ljósmynd/Reykjavíkurborg

Húsið á Laugarásvegi 11 var teiknað árið 1955 af Guðmundi Kr. Kristinssyni arkitekt fyrir Jóhannes Nordal og fjölskyldu hans. Húsið endurspeglar nýjustu strauma í byggingarlist 6. áratugar síðustu aldar. Það endurheimti nýverið mikilvæg listræn einkenni þegar litasetningu þess var breytt í samræmi við upprunalegt útlit.

Bókhlöðustígur 2

Ljósmynd/Reykjavíkurborg

Húsið á Bókhlöðustíg 2 var byggt árið 1882 sem íbúðarhús fyrir Eirík Briem, menntaskólakennara og alþingismann. Húsið er friðað vegna aldurs og hefur að mestu leyti haldist óbreytt hið ytra frá því um 1916. Húsið skipar mikilvægan sess í borgarlandslaginu og hafa nýlegar endurbætur verið gerðar með það að leiðarljósi að halda í upprunalegt útlit þess.

mbl.is