Þráinn Vigfússon hefur verið ráðinn nýr framkvæmdastjóri ferðaskrifstofunnar VITA, dótturfélags Icelandair Group. Hann tekur við af Herði Gunnarssyni sem hefur byggt upp og leitt félagið í tæpan áratug.
Þetta kemur fram í fréttatilkynningu.
Þar segir að Þráinn hafi áralanga reynslu af stjórnunarstörfum í ferðaþjónustu og hafi starfað sem fjármálastjóri VITA og Iceland Travel síðastliðin 10 ár.
Áður starfaði hann sem framkvæmdastjóri Kynnisferða, eða á árunum 2004 til 2007, eftir að hafa starfað sem fjármálastjóri fyrirtækisins frá árinu 1996. Þá hefur hann gegnt trúnaðarstörfum fyrir Samtök ferðaþjónustunnar og setið í stjórnum nokkurra ferðaþjónustufyrirtækja.
Þráinn er með cand. oecon-gráðu af endurskoðunarsviði frá Háskóla Íslands.