Vetur er genginn í garð í Landmannalaugum og jörð snævi þakin. Síðustu daga hefur gengið á með snjó og rigningu til skiptis og þykir svæðið ekki fært nema vel útbúnum bílum, helst á 35 tomma dekkjum eða stærri.
„Veðrið er búið að sýna allar hliðar í dag. Snjór, slydda og sólskin,“ segir Nína Aradóttir, yfirlandvörður að Fjallabaki. Þónokkrir jepplingar hafa fest sig í snjónum í dag og hafa flestar leiðir verið lýstar ófærar, þar með taldir vegir 208, Sigölduleið, F-208, að Fjallabaki nyrðra, og F-225, Landmannaleið.
Lokað verður þó tímabundið og verður staðan tekin aftur í fyrramálið, segir Nína og bendir ferðalöngum á að fylgjast með færð vega á heimasíðu Vegagerðarinnar. Skálar að Fjallabaki inn að Landmannalaugum verða opnir fram á þriðjudag, og von er á hóp ferðamanna sem mun gista í skálanum á Álftavatni næstu daga. Eftir það verður skálum á Laugavegi lokað fram á næsta sumar, en skálar í Landmannalaugum verða sennilega opnir fram á haust. Á næstu vikum er síðan viðbúið að vegir verði lýstir ófærir fram á sumar. Í fyrra var það gert í október, en Nína segir það ráðast af veðurfari næstu vikur.
Þar með er þó ekki sagt að enginn geti keyrt um svæðið, en aðeins þeir sem eru á vel búnum bílum geta farið um. Kalla þurfti út dráttarbíl frá Hellu til að losa bíla sem höfðu fest sig í sköflum í dag, en ekki hefur þó þurft að leita á náðir björgunarsveita.
„Þetta sleppur núna,“ segir Kári Rafn Þorbergsson, björgunarsveitarmaður hjá Flugbjörgunarsveitinni á Hellu, en hún er jafnan kölluð út til aðstoðar í Landmannalaugum. Hann veit þó til þess að bílar á sumardekkjum hafi verið á ferðinni um svæðið, en býst við að Vegagerðin lýsi vegina ófæra fyrir slíka bíla á næstu vikum.
Kári segir rigningu og snjókomu hafa skipst á síðustu daga. „Það hitnar aðeins yfir daginn og blotnar, en snjórinn nær þó ekki að hverfa. Síðan kemur hann aftur á nóttunni.
Víðar snjóar á hálendinu, en í samtali við mbl.is sagði jeppamaður sem hafði verið á ferð norðan Skjaldbreiðar að þar hefði snjó kyngt niður í gærkvöldi. Í nótt hefði reyndar rofað til, en í morgun hefði aftur byrjað að snjóa og hefði það verið alvöru þekjusnjór. Þar sem mestur snjór var náði hann jafnvel upp í felgur á 38 tomma dekkjum og víða sást ekki í veginn.