Innlent | mbl | 2.10.2019 | 7:54 | Uppfært 10:16

Varhugavert að staldra við nálægt Múlakvísl

Miðað við fyrri hlaup í Múlakvísl og þau gögn sem liggja fyrir er líklegt að hlaupið standi yfir í einhverja daga til viðbótar. mbl.is/Jónas Erlendsson

Rafleiðni í Múlakvísl heldur áfram að hækka jafnt og þétt og er nú um 270 míkróS/cm, að því er kemur fram í athugasemd sérfræðings á Veðurstofu Íslands.

Mikil gasmengun fylgir hlaupinu og í gær mældist mengunin yfir heilsuverndarmörkum. Veðurstofan er með gasmæli við Láguhvola sem er um 2 km frá jökuljaðri Kötlujökuls og fylgist áfram með gangi mála.

Frétt af mbl.is

Gasmengun yfir heilsuverndarmörkum við Múlakvísl

Veðurstofan segir varhugavert að staldra við nálægt ánni eða vera nálægt upptökum hennar. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.

Sólarupprás við Múlakvísl í morgun. Veðurstofan segir varhugavert að staldra við nálægt ánni eða vera nálægt upptökum hennar sökum gasmengunar. mbl.is/Jónas Erlendsson

Hlaupið hefur ekki náð hámarki og gæti vaxið. Mikið vatn er í ánni miðað við árstíma en þó minna en hámarkssumarrennsli. Hlaup af þessari stærðargráðu eru vel þekkt í Múlakvísl.

Miðað við fyrri hlaup í Múlakvísl og þau gögn sem liggja fyrir er líklegt að hlaupið standi yfir í einhverja daga til viðbótar. Veðurstofan, almannavarnir og viðbragðsaðilar á svæðinu munu fylgjast náið með framvindu mála næstu sólarhringa.

Svona var umhorfs við Múlakvísl í morgun. Gasmengun mældist yfir heilsuverndarmörkum í gær og rafleiðni í ánni heldur áfram að hækka. Búist er við að hlaupið standi yfir næstu daga. mbl.is/Jónas Erlendsson