Tæplega áttatíu ríkisjarðir, lóðir og lönd voru seld á árunum 2000-2019. Inni í þeirri tölu eru hins vegar ekki upplýsingar um allar sölur á ríkisjörðum til ábúenda í samræmi við kaupheimildir ábúenda samkvæmt jarðalögum.
Þetta er á meðal þess sem kemur fram í svari Bjarna Benediktssonar fjármála- og efnahagsráðherra við skriflegri fyrirspurn frá Önnu Kolbrúnu Árnadóttur, þingmanni Miðflokksins. Samkvæmt svarinu krefst samantekt á sölum til ábúenda á tímabilinu nánari úrvinnslu á vegum ráðuneytisins og Ríkiseigna.
Spurt var hvaða ríkisjarðir hafi verið seldar, hverjum og hvert söluverðið hefði verið. Fram kemur í svari ráðherrans að umræddar ríkisjarðir, lóðir og lönd hafi verið seld til bæði einstaklinga, félaga, fyrirtækja og sveitarfélaga.
Hæst verð var greitt af Kópavogsbæ fyrir hluti Fífuhvamms árið 2002 eða 700 milljónir króna og næst kemur sala á Vífilstaðalandi til Garðabæjar árið 2017 fyrir rúmar 558 milljónir. Þá var Neðra nikkelsvæði á Reykjanesi selt til Húsagerðarinnar hf. 2004 fyrir 150 milljónir.