„Ég kalla eftir því að ríkisstjórnin fordæmi þessa innrás og að hún geri það á réttum forsendum; að hún sé glæpur gegn friði sem megi ekki líðast. Jafnvel þó það gæti falið í sér að við þyrftum að horfa í spegil í kjölfarið,“ sagði Þórhildur Sunna Ævarsdóttir, þingmaður Pírata, á Alþingi.
Þórhildur Sunna fjallaði um innrás tyrkneskra hersveita í norðurhluta Sýrlands undir liðnum störf þingsins.
„Yfirlýst ástæða innrásinnar samkvæmt bandalagsþjóð okkar í NATO er að koma í veg fyrir aðgang hryðjuverkamanna að suðurhluta landamæra þeirra,“ sagði Þórhildur Sunna og hélt áfram:
„Í framhaldi heldur Tyrklandsforseti fram þeirri firru að með innrásinni muni Tyrkir varðveita landfræðilegt fullveldi Sýrlands og frelsa íbúa landsins frá hryðjuverkamönnum.“
Þórhildur Sunna sagði að það væri alveg ljóst að innrásin væri glæpur gegn friði. Það sé alveg skýrt í stofnsáttmála Sameinuðu þjóðanna og í dómum Alþjóðadómstólsins í Haag að það sé glæpur þegar fullvalda ríki ráðist inn í annað fullvalda ríki án aðkomu öryggisráðs SÞ, að undanskilinni sjálfsvörn.
„Það á augljóslega ekki við í þessu tilfelli,“ sagði Þórhildur Sunna.
Hún ítrekaði ósk sína að ráðamenn kalli innrásina glæp gegn friði og ólögmæta innrás, þrátt fyrir hræsnina sem felst í því að gera það núna en ekki til að mynda þegar aðrar þjóðar hafa ráðist inn í Sýrland.
„Einhvern tímann þurfum við að byrja að kalla hlutina réttum nöfnum.“