„Ég þurfti að bíða í 12 ár eftir að Lovestar og Blái hnötturinn kæmu út á ensku. Núna er það innan við eitt ár. Það er munur að fá að tala við heiminn í rauntíma. Það er ánægjulegt að fá að skrifa á íslensku og tala við heiminn samtímis. Þýðendur skipta miklu máli í þessu að það sé hægt að tala við fólk annars staðar í heiminum,“ segir Andri Snær Magnason rithöfundur um útgáfurétt nýjustu bókar hans Um tímann og vatnið sem hefur verið seldur til sjö landa.
Fáheyrt er að óútkomin bók njóti jafnmikillar athygli og verkið fær frá erlendum útgefendum, að sögn Egils Arnar Jóhannssonar, framkvæmdastjóra Forlagsins í samtali við Morgunblaðið nýverið. Þrjú enskumælandi forlög gefa bókina út og kemur hún út í Bretlandi, Bandaríkjunum og í Kanda. Umfjöllunarefni bókarinnar er loftslagsmál, stærsta viðfangsefni sem jarðarbúar hafa staðið sameinaðir frammi fyrir eins og það er orðað í kynningu bókarinnar.
„Þetta er ættar- og fjölskyldusaga. Ég nota jöklarannsóknarferðir ömmu og afa og aðrar slíkar sögur. Stærsta hjartað er í þessari bók þó ég sé með stórt hjarta í Blá hnettinum og öðrum sögum en það má segja að þetta sé Blái hnötturinn fyrir fullorðna. Ég er að sækja sömu tilfinningar en nota þær í raunsögu,“ segir Andri.
Hann segir mikla vakningu vera í samfélaginu og í heiminum um loftslagsvána. Andri hefur verið með verkið í vinnslu síðasta áratuginn eða svo. Hann ræddi við bæði erlenda og íslenska vísindamennn við vinnslu verksins. Greta Thurnberg, aðgerðarsinninn í loftslagsmálum, veitti honum einnig innblástur.
Í gær var Andri með sögustund upp úr verkinu á stóra sviðinu í Borgarleikhúsinu ásamt Högna Egilssyni tónlistarmanni. „Húsið var stappfullt. Við höldum þessu áfram fram á haustið,“ segir Andri um sýningu gærkvöldsins.
Bókin byggir á sögum úr fjölskyldu Andra og spilar afi hans, Björn Þorbjörnsson, stórt hlutverk í henni auk sonar hans John Þorbjarnarsonar. Afi hans Björn dó á útgáfudegi bókarinnar. „Hann er rauði þráðurinn í bókinni og John Þorbjarnarson sonur hans. Ég náði að sýna honum bókina í New York áður en hún kom út. Hann fletti í gegnum hana á tölvuskjánum mínum. Hann var hress fram á síðasta dag og dó í svefni. Hann fékk að fara með reisn eins og höfðingja sæmir,“ segir Andri og minnist afa síns með hlýju.