Lögreglan fær 355 milljónir vegna Silk Road

Sigríður Björk Guðjónsdóttir lögreglustjóri og Karl Steinar Valsson, yfirmaður miðlægrar …
Sigríður Björk Guðjónsdóttir lögreglustjóri og Karl Steinar Valsson, yfirmaður miðlægrar deildar hjá lögreglunni á höfuðborgarsvæðinu. Deildin fer fyrir rannsóknum á skipulagðri brotastarfsemi og munu 355 milljónir frá bandarískum stjórnvöldum renna í nýjan löggæslusjóð og því varið til rannsóknar á skipulagðri brotastarfsemi. mbl.is/Eggert

Íslensk stjórnvöld hafa fengið tæpar þrjár milljónir dollara frá bandarískum stjórnvöldum vegna aðstoðar við upprætingu ólöglegu síðunnar Silk Road sem hýst var hér á landi. Féð hefur verið afhent og verður varið til rannsókna á skipulagðri brotastarfsemi. Þetta kemur fram í Fréttablaðinu í dag. 

Upphæðin nemur 355 milljónum króna og er hún söluandvirði tugþúsunda bitcoina sem hýst voru í gagnaveri hér á landi. Lögreglan á höfuðborgarsvæðinu aflaði mikilvægra gagna í rannsókn málsins sem leiddi til þess að hald var lagt á rafmyntina í samstilltum aðgerðum íslensku lögreglunnar og bandarísku alríkislögreglunnar í október 2013.

Alríkislögreglunni tókst í kjölfarið að hafa uppi á Ross Ul­bricht, sem stýrði vefsíðunni Silk Road þar sem fíkni­efni voru seld á svört­um markaði.

Áslaug Arna Sigurbjörnsdóttir dómsmálaráðherra segir í samtali við Fréttablaðið að eftir að ljóst var að upphæðin yrði lögð inn í ríkissjóð var ákveðið að hún rynni í sérstakan löggæslusjóð á forræði dómsmálaráðherra. 

Samkvæmt íslenskum lögum rennur upphæðin beint í ríkissjóð en ekki beint til lögreglu, en til þess þarf lagabreytingu. Áslaug Arna segir að við fjárveitingar úr sjóðnum verði tekið mið af tillögum nefndar sem skipuð var í kjölfar útkomu skýrslu ríkislögreglustjóra um skipulagða brotastarfsemi í vor. 

mbl.is