Tollgæslan fær peningahund til afnota

Tollgæslan í Reykjavík er að fá til afnota hund sem hefur verið þjálfaður til leitar að peningaseðlum.

Áður hafði hundurinn fengið þjálfun til að finna fíkniefni og reynst vel í því. Er Tollgæslan að efla eftirlit með peningaþvætti og notkun hunda er liður í því starfi.

„Lyktin af peningaseðlum fer ekkert á milli mála. Við vinnum með hundunum í nokkur misseri og við skipulagða þjálfun læra þeir fljótt hvar seðla er að finna, en þeir þurfa þá að vera í búntum og þar með allvænar upphæðir,“ segir Steinar Gunnarsson, lögreglufulltrúi á Sauðárkróki, sem stjórnar þjálfun peningahundsins, í Morgunblaðinu í dag.