Innlent | mbl | 17.10.2019 | 16:45

Framkvæmdum um allt land verði flýtt

Sigurður Ingi á fundinum í morgun. mbl.is/Eggert Jóhannesson

Flýta þarf samgönguverkefnum í öllum landshlutum frá því sem áður hafði verið ákveðið. Þetta kemur fram í endurskoðaðri samgönguáætlun sem Sigurður Ingi Jóhannsson,samgöngu- og sveitarstjórnarráðherra, kynnti á fundi ráðuneytisins í morgun.

Sú samgönguáætlun sem nú er í gildi er fyrir árin 2019 - 2033, en á fundinum kynnti samgöngu- og sveitarstjórnarráðherra endurskoðaða áætlun frá og með næsta ári til ársins 2034.

Frétt af mbl.is

Gjaldtaka fyrirhuguð víða

Fjögur framkvæmdasvæði

Á fundinum kynnti hann m.a. þau samgönguverkefni sem þarf að flýta og skipti þeim eftir fjórum svæðum. Á Suðursvæði eru helstu verkefni aðskildar akstursstefnur frá Skeiðavegamótum að Hellu, brú á Ölfusá, vegur á leiðinni Varmá - Kambar og aðskildar akstursstefnur á leiðinni Fitjar - Rósaselstorg, sem liggur að Leifsstöð.

Kjalarnesvegur. Framkvæmdir við hann eru meðal þeirra sem á að flýta samkvæmt endurskoðaðri samgönguáætlun. mbl.is/Sigurður Bogi Sævarsson

Á Vestursvæði eru þessi verkefni brýnust: aðskildar akstursstefnur á Kjalarnesvegi og á leiðinni Akrafjallsvegur að Borgarnesi, en ráðherra sagði á fundinum að brýnt væri að aðskilja akstursstefnu á vegum þar sem umferð væri 5.000 eða fleiri bílar á sólarhring. Þá eru Dynjandisheiði og Bíldudalsvegur einnig á þessum lista.

Á Norðursvæði þarf að flýta þessum verkefnum: Brekknaheiði og Vatnsnesvegur.

Á Austursvæði er um að ræða þessar framkvæmdir: Reyðarfjörður að Breiðdalsvík, vegurinn um Lón, vegurinn við Hornafjarðarfljót, Axarvegur, Miðfjarðargöng og Fjarðaheiðargöng.