Hvorug Bombardier-vélanna seld

Hvorug tveggja Bombardier-flugvéla sem Air Iceland Connect ákvað að selja á liðnu sumri hefur enn selst, að sögn Árna Gunnarssonar framkvæmdastjóra. Önnur flugvélin er af gerðinni Dash 8-200 og hin af gerðinni Dash 8-400.

„Það eru þreifingar hér og þar en hvergi komið 100%,“ sagði Árni um sölu vélanna.

Félagið á nú sex Bombardier-flugvélar en búið er að laga mannahald að því að gera út fjórar flugvélar, að sögn Árna. „Við erum búin að vera að því síðan í sumar. Þótt þessar vélar hafi verið í rekstri þá hafa þær ekki verið í fullri notkun. Við höfum almennt verið að laga reksturinn að breyttum markaðsaðstæðum,“ segir Árni í Morgunblaðinu í dag.