„Krítískt“ ástand er olíuskip byrjaði að reka frá bryggju í Hvalfirði

Skipið Torm Venture er mjög stórt og þungt. Það hefði ...
Skipið Torm Venture er mjög stórt og þungt. Það hefði auðveldlega getað farið verr í morgun. mbl.is/Hari

„Það fá allir hland fyrir hjartað þegar svona gerist. Þú ert í virkilega slæmum málum ef það slitnar frá bryggju og ég tala nú ekki um þegar olíuslangan er tengd í land,“ segir Pétur Kristjánsson, hafnsögumaður hjá Faxaflóahöfnum, í samtali við mbl.is.

Danska olíuskipið Torm Venture var í höfninni í Hvalfirði í morgun og verið var að dæla olíu úr skipinu í olíugeymslutanka á landi þegar spilin í landfestartóginni byrjuðu að dragast út vegna veðurs, rétt um áttaleytið í morgun, og skipið tók að reka frá bryggju, með olíuslönguna tengda.

„Vindurinn var orðinn það sterkur að hann fór að ýta skipinu frá bryggjunni og þegar þú ert með svona stórt skip þá er þetta mjög alvarlegt ástand, þá verða allir hræddir,“ útskýrir Pétur og bætir við að skipið hafi verið komið fjóra metra frá landi.

Torm Venture er rúmlega 42.000 brúttótonn og ef það hefði rekið mikið lengra frá landi er hætt við því að olíuslangan hefði slitnað með tilheyrandi olíuleka og umhverfisslysi.

Dráttarbátur var samstundis sendur af stað til að koma skipinu að bryggjunni og það tókst sem betur fer. Dráttarbáturinn Magni verður á svæðinu í dag og fram á kvöld á meðan verið er að dæla olíu úr skipinu enda á veðrið að vera slæmt og því þarf að tryggja að skipið reki ekki aftur frá landi.

Myndin er tekin úr dráttarbátnum sem kom skipinu að bryggju ...
Myndin er tekin úr dráttarbátnum sem kom skipinu að bryggju á ný. Ljósmynd/Pétur Kristjánsson
Pétur Kristjánsson hafnsögumaður.
Pétur Kristjánsson hafnsögumaður. mbl.is/Árni Sæberg
mbl.is