„Það verður norðanstrekkingur og éljagangur á norðanverðu landinu en bjart á sunnanverðu landinu á morgun. Það verður mjög kalt í veðri miðað við árstíma, tveggja til sjö stiga frost,“ segir Teitur Arason, veðurfræðingur á Veðurstofu Íslands, í samtali við mbl.is.
Það hefur snjóað duglega á Akureyri og víðar á norðurlandi í dag og snjókomunni mun ekki linna fyrr en um helgina. Þrátt fyrir úrkomuleysi á sunnanverðu landinu hefur verið kalt í veðri og verður áfram næstu daga.
„Á fimmtudaginn þá herðir meira á vindinum og hann verður 13 til 20 metrar á sekúndu og bætir líka í snjókomuna á norðanverðu og austanverðu landinu,“ bætir Teitur við og tekur fram að akstursskilyrði verði slæm:
„Það verða erfið akstursskilyrði á vegunum, snjóþungt og mjög blint í snjókomunni og hvassviðrinu. En sunnanmegin á landinu verður áfram úrkomulaust en vindurinn hins vegar jafn sterkur og fyrir norðan.“
Það mun ekki lægja fyrr en síðdegis á föstudag en þá mun sömuleiðis kólna meira á öllu landinu eins og gerist í norðanáttinni.