Virkni norðurljósa yfir landinu er með mesta móti þessa dagana og um helgina mátti víða sjá fólk á opnum svæðum, utan mesta þéttbýlisins, að fylgjast með villtum dansi þeirra á næturhimni.
Á laugardagskvöldið var til dæmis fjöldi fólks við Kaldársel ofan við Hafnarfjörð, en þar eru áhrif borgarbirtu farin að dvína og góðar aðstæður til þess að sjá norðurljósin í ham.
Einu má þó gilda hvert er farið þegar norðurljósin eru í stuði; á samfélagsmiðlum hefur fólk víða af landinu birt fallegar norðurljósamyndir.
Veðurstofan gerir ráð fyrir ágætum aðstæðum til norðurljósaskoðunar í kvöld og léttskýjað verður víðast hvar.