Blaðamenn hjá útgáfufélaginu Birtíngi samþykktu nú fyrir stundu kjarasamning á milli Blaðamannafélags Íslands og Birtíngs. Samningurinn var samþykktur einróma.
Af 14 starfsmönnum Birtíngs sem eru í Blaðamannafélaginu, BÍ, greiddu 11 atkvæði og samþykktu þeir allir samninginn.
Samningurinn var undirritaður í gær með fyrirvara um samþykki samninganefndar BÍ og félagsmanna BÍ á Birtíngi og stjórnar Birtíngs. Samningurinn gildir í þrjú ár, til 1. nóvember 2022, og meðal þess sem hann felur í sér er gildistaka nýrrar launatöflu, hækkun á grunnlaunum og endurgreiddum kostnaði, endurskoðun á vaktaálagi og gildistaka á samningi um framsal á höfundarrétti, auk annarra smærri atriða.
Útgáfufélagið Birtíngur gefur út tímaritin Gestgjafann, Vikuna, Hús og híbýli og Mannlíf sem kemur út vikulega.
Enn er ósamið við þá félaga í Blaðamannafélaginu sem starfa á öðrum fjölmiðlum. Fulltrúar Blaðamannafélagsins og Samtaka atvinnulífsins hittust á stuttum fundi hjá ríkissáttasemjara í morgun og sitja nú vinnufund þar. Að öllu óbreyttu ætti kosning um vinnustöðvun félaga í Blaðamannafélagi Íslands að fara fram á morgun og niðurstaðan að liggja fyrir síðdegis þann dag. Kosið verður um fjórar vinnustöðvanir í næsta mánuði og er sú fyrsta fyrirhuguð föstudaginn 8. nóvember.
Tekið skal fram að blaðamaður og flestir aðrir blaðamenn á ritstjórn mbl.is og Morgunblaðsins eru félagar í Blaðamannafélagi Íslands.