Segir nauðsynlegt að efla varaflugvellina
Setja bókamerki
„Þetta er auðvitað mjög alvarlegt mál,“ segir Njáll Trausti Friðbertsson, þingmaður Sjálfstæðisflokksins, um það þegar flugmaður Icelandair lýsti yfir neyðarástandi þegar hann var að koma inn til lendingar á Keflavíkurflugvelli snemma á mánudagsmorgun.
Lítil einkaþota sem sinnir sjúkraflugi hafði runnið út af flugbrautinni með átta manns innanborðs og hafnað í kanti við enda hennar. Hin flugbraut Keflavíkurflugvallar var lokuð tímabundið vegna ísingar og því átti að senda flugvél Icelandair á Reykjavíkurflugvöll sem var varaflugvöllur í flugáætlun vélarinnar.
Hins vegar var Reykjavíkurflugvöllur lokaður en hann er lokaður allri umferð frá kl. 23 að kvöldi til kl. 7 að morgni alla virka daga og frá kl. 23 að kvöldi til kl. 8 að morgni um helgar samkvæmt starfsleyfi Heilbrigðiseftirlits Reykjavíkurborgar.
Njáll Trausti, sem var formaður starfshóps um framtíð innanlandsflugs og var flugumferðarstjóri á Akureyrarflugvelli áður en hann tók sæti á Alþingi 2016, segir að stórefla þurfi varaflugvelli fyrir millilandaflug í Reykjavík, á Akureyri og á Egilsstöðum.
Hann segir að skorið hafi verið niður til varaflugvalla síðan árið 2011 en á sama tíma hafi millilandaflug „belgst út“, eins og Njáll orðar það.
Njáll bendir á að hann hafi skilað skýrslu í desember undir heitinu „Uppbygging flugvallakerfisins og efling innanlandsflugsins sem almenningssamgangna“. Þar hafi meðal annars verið bent á að millilandaflugvellirnir í Keflavík, Reykjavík, Akureyri og á Egilsstöðum yrðu skilgreindir sem kerfi með sameiginlegum kostnaðargrunni og Isavia falin fjárhagsleg ábyrgð á rekstri, viðhaldi og uppbyggingu þeirra.
„Á sama tíma og umferð um Keflavíkurflugvöll hefur margfaldast frá 2010 hefur uppbygging varaflugvalla setið eftir,“ segir Njáll. Hann bendir á að sinna þurfi ýmsum framkvæmdum á varaflugvöllunum í Reykjavík, Akureyri og á Egilsstöðum en til þess þurfi aukið fjármagn til flugvallanna.
Fjárfestingin 115 milljarðar króna
Þrjú og hálft ár fyrir skotárás í Úlfarsárdal
„Það er skiljanlegt að þolinmæði þeirra sé lítil“
Segir óábyrgt að skipta út öllu bankaráðinu
„Tíminn er runninn út fyrir Kristján Loftsson“
Hjón sluppu með skrekkinn