Skíðasvæði Bláfjalla teygir sig til Ölfuss

Til stendur að stækka skíðasvæði Bláfjalla inn í sveitarfélagið Ölfus. Leggja á diskalyftu úr Kerlingardal upp á topp Bláfjalla, auk þess sem efri endastöðvar tveggja nýrra lyfta verða innan marka sveitarfélagsins, en með því verða til nýjar skíðaleiðir.

Tillaga að deiliskipulagi þess efnis var auglýst í gær. Skipulagssvæðið sem um ræðir er um 100 hektarar að stærð, suðaustan núverandi skíðasvæðis í austurhlíðum Bláfjalla. Svæðið er lítt gróið, sérstaklega í fjallshlíðum, að því er segir í auglýsingunni. Ólíkt núverandi brekkum í skíðasvæði Bláfjalla, sem sveitarfélögin á höfuðborgarsvæðinu reka, veit svæðið því mót sólu.

Í samtali við mbl.is segir Einar Bjarnason, rekstrarstjóri í Bláfjöllum, að framkvæmdirnar fyrirhugðu séu liður í samkomulagi sem borgarstjóri og bæjarstjórar á höfuðborgarsvæðinu undirrituðu í fyrravor. „Við lendum í því að þurfa að fara aðeins inn á landið þeirra [Ölfusar] en það er öll aðkoma þeirra að þessu,“ segir Einar og bætir við að bæjarstarfsmenn hafi verið mjög samvinnuþýðir og því hafi undirbúningur gengið hratt og vel.

Frétt af mbl.is

Búist við 50% aukningu í Bláfjöll

Fyrir eru í Kerlingardal gönguskíðaleiðir og ekki ætlunin að loka þeim. Þvert á móti muni hinar nýju lyftur gagnast gönguskíðamönnum, sem geti þá komist niður úr fjallinu með nýju lyftunum vilji þeir það. Vonir standa til að flestar lyfturnar verði komnar upp eftir 5-6 ár.

Framkvæmdasvæðið. Teikning/Ölfus

• Blogga um frétt