„Velkominn, nóvember“

Óvenjuleg sjón sem blasti við blaðamönnum mbl.is í Hádegismóum í morgun, enda sjaldnast sem nokkur á þangað erindi í morgunsárið nema til vinnu. Þangað var kominn fríður flokkur á að giska hundrað hlaupara, svokallaðra náttúruhlaupara, í upphitun undir morgunhlaup.

Birkir Már Kristinsson, einn forsprakka hópsins, segir náttúruhlaupin ólík hefðbundnum hlaupum þar sem valdar eru náttúrulegar hlaupaleiðir í stað þess að hlaupa á hefðbundnum götum og hlaupastígum. Þannig geti fólk notið náttúrunnar og hreyft sig samtímis.

Náttúruhlaupin hafa verið haldin reglulega frá 2014 og hópurinn hlaupið um hin ýmsu útivistarsvæði í nágrenni höfuðborgarinnar. Nú var röðin komin að Rauðavatni, og eftir samstillta upphitun á bílastæði Morgunblaðsins lagði hópurinn í hann í þremur hollum.

Birkir segir að markmiðið með hlaupunum sé fyrst og fremst að hafa gaman og njóta náttúrunnar, en margir fái þó bakteríuna og færi sig yfir í fjallahlaup og önnur kapphlaup á borð við Laugavegshlaupið.

Að svo búnu er viðtalinu lokið, því áður en lagt er í hann þarf hópurinn að bjóða nóvember velkominn. Annar hópstjóri safnar mannfjöldanum saman í hring og svo tekur fólkið til við að kyrja nafn mánaðarins milli þess sem það reigir sig og beygir til að tryggja að líkaminn sé í réttu standi áður en haldið er af stað. „Velkominn, nóvember.“

Það verður ekki sagt um Hádegismóa að útsýnið sé slæmt. mbl.is/Alexander

• Blogga um frétt