Banna flutning á alifuglum frá Dísukoti

Bannið gildir um flutning á öllum alifuglum frá Dísarkoti. Mynd ...
Bannið gildir um flutning á öllum alifuglum frá Dísarkoti. Mynd úr safni. mbl.is/Eggert Jóhannesson

Matvælastofnun hefur sett flutningsbann á alla alifugla frá bænum Dísukoti í Þykkvabæ. Er ástæða flutningsbannsins sögð vera meintur ólöglegur innflutningur kalkúnafrjóeggja frá Færeyjum á síðasta ári, en úr eggjunum eru komnir svartir kalkúnar sem voru í fréttum nýverið.

Segir í frétt á vef MAST að með banninu sé miðað að því að koma í veg fyrir mögulega dreifingu smitsjúkdóma í aðra alifugla.

Í lögum um innflutning dýra kemur fram að óheimilt sé að flytja til landsins hvers konar dýr, tamin eða villt, svo og erfðaefni þeirra. Geta ný smitefni borist til landsins með frjóeggjum, að því er segir í frétt MAST.

Ráðherra geti hins vegar heimilað innflutning dýra og erfðaefnis að fengnum meðmælum Matvælastofnunar og sé slíkt þá gert undir ströngum skilyrðum.

Segir MAST verið að afla upplýsinga um innflutninginn og aðkomu og ábyrgð hlutaðeigandi aðila.

mbl.is