Gæsluvarðhald yfir manni á fertugsaldri, sem grunaður er um alvarlega líkamsárás og jafnvel tilraun til manndráps gegn unnustu sinni, hefur verið framlengt til 6. desember næstkomandi.
Þetta staðfestir Bylgja Hrönn Baldursdóttir, lögreglufulltrúi hjá kynferðisbrotadeild lögreglunnar á höfuðborgarsvæðinu, í samtali við mbl.is, en Vísir greindi fyrst frá.
Maðurinn var handtekinn 7. október síðastliðinn og hefur sætt gæsluvarðhaldi síðan. Samkvæmt frétt Vísis er krafa um gæsluvarðhald byggð á grundvelli almannahagsmuna, hann sé hættulegur öðru fólki. Manninum er gefið að sök að hafa barið unnustu sína ítrekað, tekið hálstaki svo hún missti meðvitund og rist hana á hægra læri með veiðihníf. Þá er hann sakaður um að hafa nauðgað henni.
Árásin átti sér stað í gámum úti á Granda, sem eru úrræði Reykjavíkurborgar fyrir langt leidda fíkla. Maðurinn á jafnframt að baki dóm fyrir ofbeldi gegn sambýliskonu.
Fjallað er um á vef RÚV í dag að starfsmenn Þingvangs, sem vinna að því að reisa hverfisbækistöð Reykjavíkurborgar að Fiskislóð, hafi upplifað líflátshótanir og skemmdarverk af hálfu skjólstæðinga velferðarsviðs borgarinnar sem þar búa.