Heita vatnið tekið af á stóru svæði

Það verður ekki hægt að fara í heita sturtu í …
Það verður ekki hægt að fara í heita sturtu í Hreyfingu og Laugum í dag. mbl.is/Styrmir Kári

Vegna tengingar hitaveitu má reikna með að heitavatnsþrýstingur verði lágur í Vogahverfi, Laugarási og við Laugardal í Reykjavík og heitavatnslaust þar sem byggð stendur hærra í dag.

Laugardalslaug er lokuð vegna vinnunnar og reikna má með að lokunin hafi áhrif á þjónustu á svæðinu. Meðal annars hafa foreldrar barna í skólum á svæðinu verið beðnir um að senda börn sín vel klædd í skólann og hjá Hreyfingu verður lokað fyrir sturtur og heita potta og World Class hefur varað viðskiptavini sína við því að sturtur geti verið kaldar í dag. 

Verið er að tengja nýja aðalæð hitaveitunnar við Elliðaárbrýr og flytur hún mestallt það vatn sem notað er í hverfinu. Til að minnka áhrifin á neytendur er vatni veitt inn í hverfin eftir öðrum leiðum. Þær eru þó ekki eins afkastamiklar og því má búast við lækkuðum þrýstingi og jafnvel heitavatnsleysi, einkum í þeim húsum sem hæst standa á Laugarásnum. Vinnan hefst með því að tæma lagnir og var það gert klukkan 6:00 og vonast er til að hægt verði að hleypa á nýju lögnina klukkan 20:00 í kvöld. Það mun taka einhverja klukkutíma að ná upp fullum þrýstingi á kerfið.

Starfsfólk Veitna brýnir fyrir fólki að hafa glugga lokaða og útidyr ekki opnar lengur en þörf krefur til að koma í veg fyrir að kólni. Þar sem heitavatnslaust verður er ráðlegt að hafa skrúfað fyrir alla heitavatnskrana til að draga úr hættu á slysi eða tjóni þegar vatnið kemst á að nýju.

mbl.is