Þorgerður Anna Gunnarsdóttir
„Fundi lauk núna síðdegis og Samtök atvinnulífsins munu hitta hluta samninganefndaraftur á morgun og síðan er fundur boðaður hjá ríkissáttasemjara á nýjan leik á fimmtudag,“ segir Halldór Benjamín Þorbergsson, framkvæmdastjóri Samtaka atvinnulífsins, eftir fund með Blaðamannafélagi Íslands hjá ríkissáttasemjara í dag.
Um var að ræða fyrsta fund samninganefnda féleganna eftir fyrstu vinnustöðvun Blaðamannafélagsins síðastliðinn föstudag.
Aðspurður hvað farið hefði fram á fundinum segist Halldór Benjamín bundinn trúnaði. „En við erum að tala saman og hver fundur færir okkur nær lausn. Það eina sem ég get sagt er að við hittumst á morgun og á fimmtudag og við vonum að það leiði til einhvers góðs.“
Kjarasamningar Blaðamannafélags Íslands við fjölmiðlafyrirtækin fjögur sem standa innan Samtaka atvinnulífsins, Árvakur, Sýn, Ríkisútvarpið og Torg, runnu út 1. janúar og var kjaraviðræðum vísað til ríkissáttasemjara í lok maímánaðar.
Félagsmenn Blaðamannafélagsins samþykktu vinnustöðvun með atkvæðagreiðslu í lok október og fór sú fyrsta fram föstudaginn 8. nóvember. Þá hafa vinnustöðvanir verið boðaðar föstudagana 15. og 22. nóvember og loks fimmtudaginn 28. nóvember, að því gefnu að ekki takist að semja.
Tekið skal fram að blaðamaður og flestir aðrir blaðamenn á ritstjórn mbl.is og Morgunblaðsins eru félagar í Blaðamannafélagi Íslands.