Dregur til tíðinda á föstudag

Skilin sem hafa strítt okkur með sínum óútreiknanlegu lægðahnútum eru nú að trosna yfir landið og því rólegra veður í vændum segir veðurfræðingur á Veðurstofu Íslands. Hann segir að dragi til tíðinda á föstudag.

„Suðaustan- og austangola eða -kaldi í dag með skúrakenndri úrkomu S- og V-lands og jafnvel slydduéljum en þurrt að mestu á N- og A-landi. Það færist síðan yfir köld norðaustanátt í nótt og á morgun með éljum NA-til en léttir til S- og V-lands. Fremur rólegur vindur og frystir þá um mestallt land. Svipað veður á fimmtudag. Dregur síðan til tíðinda á föstudag þegar næstu skil koma að landi úr vestri en þau virðast ætla að sigla hratt yfir landið og í kjölfar þeirra kólnar aftur í útsynningi með éljum,“ segir í hugleiðingum veðurfræðings á Veðurstofu Íslands.

Veðurspá fyrir næstu daga

Suðaustlæg átt, víða 5-13 m/s, en dregur úr vindi á N- og A-landi þegar kemur fram á daginn. Skúrir eða slydduél S- og V-lands, stöku él við A-ströndina, en annars þurrt. Hiti 1 til 5 stig, en 1 til 5 stiga frost í innsveitum NA-lands.
Norðlægari 3-13 á morgun, hvassast austan Öræfa. Él NA-til, en annars yfirleitt léttskýjað. Frost 0 til 6 stig.

Á miðvikudag:
Norðaustlæg átt 3-10 m/s og dálítil él NA-lands, en léttskýjað um landið sunnan- og vestanvert. Frost víða 0 til 7 stig og talsvert næturfrost inn til landsins.

Á fimmtudag:
Norðlæg átt, 3-10 m/s og léttskýjað, en lítils háttar él með NA-ströndinni. Áfram frost um mestallt land, einkum inn til landsins. Vaxandi sunnanátt vestast um kvöldið og þykknar upp.

Á föstudag:
Hvöss sunnanátt með talsverðri rigningu og hlýnar, en slydda eða snjókoma í fyrstu fyrir norðan. Vestlægari með deginum, fyrst V-til undir hádegi, með skúrum eða éljum og kólnar aftur.

Á laugardag:
Suðvestlæg átt, 5-13 og él, en léttskýjað A-til á landinu. Víða frostlaust við V-ströndina, en annars frost 1 til 7 stig og kaldast í innsveitum NA-lands.

Á sunnudag:
Dregur úr vindi og éljum og áfram bjart A-lands. Hiti breytist lítið.

Á mánudag:
Útlit fyrir stífa suðaustanátt með rigningu, en þurrt NA-lands. Hlýnandi.

mbl.is