Tollgæslan stöðvaði í lok október erlenda konu í Flugstöð Leifs Eiríkssonar vegna gruns um fíkniefnasmygl. Var hún færð á lögreglustöð þar sem hún skilaði af sér um það bil 30 pakkningum af kókaíni. Þetta kemur fram í tilkynningu frá lögreglustjóranum á Suðurnesjum.
Samtals var um að ræða tæp 400 grömm af efninu og var konan í framhaldinu úrskurðuð í gæsluvarðhald meðan á rannsókn málsins stendur. Fram kemur að rannsóknin sé nú á lokastigum.