„Það var vinnufundur í gær og hann var ágætur,“ segir Hjálmar Jónsson, formaður Blaðamannafélags Íslands. Samninganefnd Blaðamannafélagsins og Samtök atvinnulífsins funda hjá ríkissáttasemjara á morgun.
„Það er alltaf jákvætt á meðan fólk talar saman en hvað það dregur. Ég er því miður ekkert sérstaklega bjartsýnn,“ segir Hjálmar.
Kjarasamningar Blaðamannafélags Íslands við fjölmiðlafyrirtækin fjögur sem standa innan Samtaka atvinnulífsins, Árvakur, Sýn, Ríkisútvarpið og Torg, runnu út 1. janúar og var kjaraviðræðum vísað til ríkissáttasemjara í lok maímánaðar.
Félagsmenn samþykktu vinnustöðvun með atkvæðagreiðslu í lok október og fór sú fyrsta fram föstudaginn 8. nóvember. Þá hafa vinnustöðvanir verið boðaðar föstudagana 15. og 22. nóvember og loks fimmtudaginn 28. nóvember, að því gefnu að ekki takist að semja.
Blaðamannafélagið hyggst stefna meintum verkfallsbrotum frá fyrstu vinnustöðvuninni til Félagsdóms en Hjálmar segir að enginn úrskurður sé væntanlegur þaðan fyrir næstu vinnustöðvun, sem verður að öllu óbreyttu eftir tvo daga.
„Þetta næst ekki, því miður. Við stefnum málinu fyrir Félagsdóm og viljum fá niðurstöðu. Að okkar mati eru þetta algjörlega skýr brot, því miður.“
Hjálmar segir að vinnustöðvuninni á föstudag verði haldið til streitu, þrátt fyrir að hann hafi áhyggjur af meintum brotum.
„Þetta er löglega boðuð vinnustöðvun og við höldum okkar striki. Þetta eru átta tímar á föstudaginn og vonandi virða menn það,“ segir Hjálmar og heldur áfram:
„Ég geng út frá því að menn fari að lögum.“
Ekki náðist í Halldór Benjamín Þorbergsson, framkvæmdastjóra SA, við vinnslu fréttarinnar.
Tekið skal fram að blaðamaður og flestir aðrir blaðamenn á ritstjórn mbl.is og Morgunblaðsins eru félagar í Blaðamannafélagi Íslands.