Ekki í mínum höndum að krefjast frystingar
Setja bókamerki
Helga Vala Helgadóttir, þingmaður Samfylkingarinnar, leiðrétti rangfærslur um að hún hafi viljað krefjast frystingar á eignum Samherja heldur hafi hún verið að vísa til þess að oft séu eignir frystar þegar rannsókn stendur yfir. Það sé hins vegar ekki í hennar höndum að krefjast frystingar. Helga Vala er gestur í Silfrinu í Sjónvarpinu en þar var meðal annars rætt um mál Samherja og viðskipti fyrirtækisins í Namibíu.
Helga Vala segir að með kyrrsetningu eigna er ekki verið að tala um verkstöðvun að ræða heldur sé komið í veg fyrir að eignir séu seldar úr fyrirtæki. Það hafi til að mynda verið gert í máli hljómsveitarinnar Sigur Rósar.
Efnahagsbrotarannsóknir séu oft mjög flóknar og eins skattalagarannsóknir, að sögn Helgu Völu. Þær taki tíma og á þeim tíma getur verið einfalt fyrir fólk að skjóta undan eignum líkt og sást í hruninu. Hún segir að málið beinist ekki að starfsfólki Samherja né Dalvíkingum líkt og Þorsteinn Már Baldvinsson sagði á fundi með starfsfólki á Dalvík í vikunni.
„Þorsteinn Már Baldvinsson, fráfarandi forstjóri Samherja, stappaði stálinu í starfsfólk félagsins á fundi í fiskvinnslu félagsins á Dalvík á fimmtudaginn. Hann byrjaði fundinn á því að segja umfjöllun um meintar mútugreiðslur og annað sem viðkemur starfsemi Samherja í Namibíu vera „árás á starfsmenn Samherja“. Því hefði hann ákveðið að stíga til hliðar. Til að vernda starfsfólkið,“ segir í frétt á Vísi.
„Mér finnst ljótt af Þorsteini Má að gera þetta fólk samsekt með sér,“ sagði Helga Vala.
Sigríður Andersen, þingmaður Sjálfstæðisflokksins, segir fara illa á því að stjórnmálamenn, sem beri meiri ábyrgð en flestir aðrir, og afar óeðlilegt og óheppilegt að þeir séu að fella dóma sem að sjálfsögðu sé verið að gera í máli Samherja. Vísaði hún þar til umræðu á Alþingi um slík mál. Að hennar sögn eru ömurleg dæmi um það að mál gegn einstaklingum og fyrirtækjum hafi ratað inn í þingsal, svo sem Guðmundar- og Geirfinnsmálið og Hafskipsmálið þar sem ummæli hafa fallið um fólk sem hefur ekki tækifæri til að verja sig.
Að sögn Sigríðar þarf auðvitað að ræða mútur erlendis og íslensk hegningarlög sé mjög skýr þar. Hún segir að þetta gefi gott tækifæri á að vekja athygli á þessari löggjöf. Eðlilega hafi allir skoðun á þessu máli og þar á meðal stjórnmálamenn en forðast eigi að valda öðru fólki meira tjóni en orðið er í sölum Alþingis.
Sólveig Anna Jónsdóttir, formaður Eflingar, segir mjög merkilegt að sjá Þorstein Má tala um árás á starfsfólk. Maður sem sjálfur hagnast um tæpa 5 milljarða á einu ári. Eins og að þau séu saman á báti í þessu máli - hann og starfsfólk Samherja. Eins og það hafi eitthvað með þetta fólk að gera að hann hafi gerst sekur um glæpsamlegt athæfi, sagði Sólveig Anna í Silfrinu. Hún segir að þetta sé ótrúlega absúrd og að hennar mati lágkúra. Þetta komi hinsvegar ekki á óvart miðað við hvað menn eins og hann hafi komist upp með í þessu samfélagi.
Hjálmar Gíslason fjárfestir var spurður af Agli Helgasyni þáttastjórnanda hvort Ísland væri spillt og segist hann stórefa að Ísland sé spillt en gallinn við íslenskt samfélag séu stuttar boðleiðir. Að þeir sem eigi vini í ráðuneytum og víðar nýti sér þessa vináttu og geri sér oft ekki grein fyrir því hvað þetta er óeðlilegt og að aðrir njóti ekki þessarar fyrirgreiðslu.
Vona að Orkustofnun veiti ekki virkjunarleyfi
Skiptir miklu meira máli en fólk grunar
Tveir í bílnum sem lenti utan vegar
Árshátíð ríkislögreglustjóra haldin í Tékklandi
Veiting hvalveiðileyfis ekki brot á EES-samningi
Vélsleðaslys: Þyrlan kölluð út á mesta forgangi
Skar höfuðleðrið af íslenskri konu