Innlent | mbl | 19.11.2019 | 14:18 | Uppfært 14:56

500 milljónir í innviðauppbyggingu í Vogabyggð

Séð yfir Súðarvog sem tilheyrir Vogabyggð. mbl.is/Arnþór Birkisson

Um leið og grunnskólabörn flytja í Vogabyggð verður þeim boðinn skólaakstur í Vogaskóla til að tryggja öryggi þeirra í umferðinni. Þau þurfa að fara yfir Sæbraut til að sækja skólann. Engin grunnskólabörn hafa flutt í hverfið og því er ekki þörf á skólaakstri enn sem komið er en það gæti breyst í vetur, að sögn Sigurborgar Óskar Haraldsdóttur formanni Skipulags- og samgönguráðs Reykjavíkurborgar.

Betur fór en á horfðist nýlega þegar tvö börn voru á leið yfir gangbraut á Sæbrautinni við Vogabyggð þegar bíll ók næstum á þær en þetta mátti ekki tæpara standa, að sögn vitnis. Bent hefur verið á að þörf er á að stuðla að auknu öryggi gangandi og hjólandi vegfarenda yfir Sæbraut við Tranavog og Snekkjuvog.

Frétt af mbl.is

Skólabörnum ekið yfir Sæbraut

Unnið er að því að rýna gatnamótin til að finna heppilega lausn. Á skipulagi er gert ráð fyrir göngubrú yfir Sæbraut við Tranavog og Snekkjuvog og einnig er verið að rýna hugmyndir um að setja Sæbraut í stokk en „það myndi bæta öryggi gangandi sem best,“ segir Sigurborg.

Gert er ráð fyrir 500 milljónum króna í innviðauppbyggingu á ári til Vogabyggðar sem fara meðal annars í gatnagerð, lýsingu og fleiri þætti sem auka öryggi gangandi vegfarenda, að sögn Sigurborgar.

„Þegar við horfum á þessi gatnamót eins og þau eru í dag eru ýmsir þættir sem hægt væri að grípa til sem taka ekki eins langan tíma og þessi stóru atriði, göngubrú og Sæbraut í stokk. Það er t.d. að lækka leyfilegan hámarkshraða, auka eftirlit með hraðamyndavélum, breyta legu hjóla- og göngustíga, bæta lýsingu sérstaklega við þveranir gatna,“ segir Sigurborg.

Ekki liggur fyrir í hvaða framkvæmdir verður farið til að auka umferðaröryggi á þessum slóðum því rýnivinna er enn í fullum gangi. Hins vegar ætti það að skýrast innan nokkurra vikna, að sögn Sigurborgar sem tekur fram að lögð er áhersla á að vinna þessi mál hratt og vel.