Búið er að bera kennsl á einn af mönnunum sem réðust á þrjá dyraverði á skemmtistaðnum Sólon um síðustu helgi.
Nafn mannsins kom eftir ábendingu frá lögreglumanni. Að sögn Guðmundar Páls Jónssonar, lögreglufulltrúa hjá lögreglunni á höfuðborgarsvæðinu, réðust að minnsta kosti þrír menn á dyraverðina. Hann segir að rannsókn málsins miði vel áfram og klárist fljótlega ef næst í manninn sem bent var á. Talið er að árásarmennirnir séu erlendir.
Lögreglan hefur skoðað myndefni sem hefur borist vegna árásarinnar, bæði frá einstaklingum sem höfðu tekið upp efni á símann sinn og úr eftirlitsmyndavélum sem eru inni á skemmtistaðnum og fyrir utan hann.
Jafnframt er búið að taka skýrslu af öllum þremur dyravörðunum.
Spurður út í líðan dyravarðanna segir Guðmundur Páll að sá sem fluttur var á slysadeild eftir að sparkað hafði verið í höfuð hans virðist hafa sloppið tiltölulega vel „miðað við hvað árásin var heiftarleg“.