Vilja reisa kláf á Ísafirði

Félagið Odin Skylift hefur óskað eftir því við bæjarráð Ísafjarðarbæjar að settur verði upp kláfur sem færi upp Eyrarfjall.

Bæjarráð gerði ekki athugasemd við umsóknina, sem var lögð fram á fundi bæjarráðs á mánudaginn, en bendir á að gæta þurfi að öryggi og umhverfissjónarmiðum.

Á fundinum var lögð fram tillaga að einni byrjunarstöð og einni endastöð fyrir lyftu upp Eyrarfjall. Ákvörðun um endanlega staðsetningu yrði tekin í samráði við bæjaryfirvöld í kjölfar breytts aðal- og deiliskipulags sem nú er í vinnslu.

Í tillögunni er jafnframt gert ráð fyrir veitingastað og hóteli á Eyrarfjalli, auk göngustíga og aðstöðu fyrir ýmsa útivist á svæðinu.

Hugmyndir Odin Skylift samkvæmt tillögum sem lagðar voru fram í bæjarráði Ísafjarðar.

Fram kom í samtali við Gissur Skarphéðinsson, framkvæmdaraðila verkefnisins, í Bylgjufréttum að fjárfestahópur væri tilbúinn að verja um tveimur og hálfum milljarði króna í að reisa kláfinn. Ef áætlanir ganga eftir mun hann ferja fyrstu farþegana upp á 250 manna veitingastað á toppi fjallsins eftir þrjú ár.

Búið er að skrá 140 skipakomur til Ísafjarðar næsta sumar, að sögn Gissurar, og á hann þar við farþega skemmtiferðaskipa. Ein ferð upp á að kosta 7.500 krónur en hugmyndin um verkefnið kom fyrir þrettán árum frá Úlfari Úlfarssyni, verslunareiganda á Ísafirði.

• Blogga um frétt