Daginn eftir að WOW air hætti starfsemi, 28. mars, spáði Már Guðmundsson, þáverandi seðlabankastjóri, því að fall félagsins myndi hafa neikvæð áhrif á hagvöxt. Það hefur raungerst enda mældist nær enginn hagvöxtur fyrstu 9 mánuði ársins.
Til samanburðar var 4,6% hagvöxtur í fyrra.
Skráð atvinnuleysi í mars mældist 3,2% og voru að jafnaði 5.962 einstaklingar á atvinnuleysisskrá í mánuðinum. En til upprifjunar sagði WOW air upp nokkur hundruð starfsmönnum í desember sl. vegna endurskipulagningar. Skráð atvinnuleysi í október mældist 3,8% en að jafnaði voru 7.039 einstaklingar á atvinnuleysisskrá í október. Síðan hafa fréttir borist af uppsögnum hjá nokkrum félögum.
Már fór yfir málin á síðasta ársfundi sínum hjá bankanum, 29. mars.
Við það tilefni sagði hann ljóst að fall flugfélagsins myndi hafa neikvæð áhrif á hagvöxt, sérstaklega á þessu ári. Ekki væri þó víst að það eitt og sér myndi leiða til samdráttar. Sagði hann að viðnámsþróttur væri nú mikill til að bregðast við áföllum.
Færu eftir viðbrögðunum
Már sagði jafnframt að hin efnahagslegu áhrif af falli WOW air myndu mikið til velta á viðbrögðum annarra flugfélaga.
Við fall WOW air bættust erfiðleikar Icelandair vegna kyrrsetningar Max-þotna. Það var mjög óvæntur atburður sem hafði neikvæð áhrif á ferðaþjónustu víða um heim.
Samdráttur í útflutningi á þjónustu
Landsframleiðslan jókst að raungildi um 0,2% fyrstu níu mánuði ársins borið saman við sama tímabil á síðasta ári samkvæmt tölum frá Hagstofunni.
Samdráttur í landsframleiðslu mældist 0,1% á þriðja ársfjórðungi sem skýrist einkum af neikvæðum áhrifum utanríkisviðskipta á hagvöxt að því er segir í fréttatilkynningu.
Þar segir að samdráttur í útflutningi á þjónustu vegi þar þyngst en hann hafi mælst 16,7% á tímabilinu. Ferðaþjónustan vegur þar þungt.
Þá segir að árstíðaleiðrétt landsframleiðsla hafi að raungildi dregist saman um 0,7% milli annars og þriðja ársfjórðungs 2019.