Annar tveggja manna sem unnu við stíflu í Núpá í Sölvadal í Eyjafirði féll í ána á tíunda tímanum í kvöld, samkvæmt tilkynningu frá lögreglunni á Norðurlandi eystra. Maðurinn er ófundinn.
Í tilkynningu segir að krapagusa hafi hrifið manninn með sér og var allt tiltækt björgunarlið sent á vettvang ásamt lögreglumönnum og lækni, auk þess sem þyrla Landhelgisgæslunnar var kölluð til.
Þyrlan er rétt ókomin á vettvang, en um borð í henni eru fjórir kafarar sem munu hjálpa til við leit.
Björgunarsveitarfólk leitar nú meðfram ánni og verið er að ræða við aðstandendur mannsins.
Erfiðlega gekk að komast á vettvang vegna ófærðar og þurfti snjóruðningstæki að fara á undan, auk þess sem erfiðlega gekk að ná aftur sambandi við þann sem tilkynnti um slysið og var því lítið vitað um aðstæður.
Björgunarsveitir voru fyrstar á staðinn á tólfta tímanum í kvöld og hófu þær þá upplýsingaöflun og leit.