Fjórir lambhrútar frá Vestfjörðum voru fluttir til Norðurlands eystra að öllum líkindum í óleyfi. Matvælastofnun hefur óskað eftir lögreglurannsókn á málinu. Óheimilt er að flytja sauðfé yfir varnarlínu nema í undantekningartilfellum.
Meintur flutningur uppgötvaðist við eftirlit og hefur flutningsbann verið sett á hrútana. Þetta kemur fram í tilkynningu.
„Árið 2016 sótti viðtakandi hrútanna um leyfi til Matvælastofnunar um kaup á fimm lambhrútum úr Vestfjarðahólfi vestra. Þeirri umsókn var hafnað,“ segir í tilkynningu á vef Matvælastofnunar.
Ítrekað er að markmið dýrasjúkdómalaga er að hindra útbreiðslu dýrasjúkdóma og útrýma þeim.